أولى .. والبداية الممتعة :D

بسم الله الرحمن الرحيم
السلام عليكم ورحمة الله وبركاته

إلى شباب إعدادى اللى ربنا كرمهم وبقوا فى سنة أولى ..ألف مبرووك وأهلا بيكم فى كليتكم..على اساس انكم كنتو بعيد عن كليتكم إلا قليلا يعنى

بدايةً .. انا كنت نفسى أكتب العنوان .."سنة أولى..والبداية المتعبة".. مش الممتعة
بس الصراحة نظرا لخوفى من تريقة إخواننا اللى ربنا ابتلاهم بسنة تانية قبلينا ..فقلت الطيب احسن وخليها هنا فالمتدارى وبيننا وبين بعتينا..
وسبب كمان ..إنى حاسة انى لما هبقى فمكانهم اكيد هقول كده .. بس ربنا يسهل

نبدأ بقى باسم الله.. وأحب أقول ..إن مفيش حاجة سهلة.. يعنى هتدرس وانت بتدرس فى سنة اولى وتبقى بتستغرب من كلام اللى قبليك على إن أولى سهلة ..
ولو انتو حطيتوا فبالكم انها سنة سهلة..محدش هيطلع منها بالنتيجة المرجوة..لا قدر الله

نتكلم بقى تفصيليًا عن المواد..
عندكم إن شاء الله ست مواد..2 اسنان + 4 بشرى

مواد أسنان والأهم واللى كل منهما عليها 150 درجة:

1- Dental Materials

مادة حلووة وممتعة -واللى فالاول هتحسوا انها رخمة شوية رغم سهولتها -لأنها(من اسمها كده)بتعرض المواد اللى بيستخدمها طبيب الاسنان وخواصها بشىء من التفصيل ..ودى حاجة مهمة فعلا لازم يبقى ملم بيهامينفعش مثلا يبقى دنتست وميعرفش ايه خواص حشوة ال amalgam
اللى هى مينفعش دكتور ميبقاش عارفها ..وكمان يبقى عارف ممكن تتكسر ازاى؟ ايه مدى قوتها؟؟
لونها بيتغير ازاى ومع انهى مواد بالظبط؟؟
وهكذا
عبارة عن كتابين ..ومتتخدوش من شكلهم هما كلامهم كتيير ..لأن المادة مش صغيرة
اول كتاب مادة علمية بحتة يعنى شوية فيزيا على كميا...والكتاب التانى بيربط اللى خدته فالكتاب الاول بالمواد نفسها بالتفصييييلوامتحانها بتاع اخر السنة بيجى فى صورة MCQs
حوالى 300 سؤال ..واحنا جالنا 285عايزة تدريب كتيير وحل اسئلة كتييير
وفى امتحانين Mid-termsامتحان فى كل ترم ب 7.5 درجات يعنى 15 اعمال سنة ..ومفيش عملى ..
السكاشن عبارة عن شرح حاجات متقالتش فالمحاضرة ...
وساعات اعادة شرح اللى بيتقال تانى..وتشوفوا المواد عالطبيعة وتشموا روايحها المميزة ...
وتخلوا بالكم من الاشكال لأنها ساعاات بتبقى فاتحة سؤال فى امتحان الشفوى ..بس مش دايما

المادة عايزة حفظ كتييير مع فهم اكيييييد ..بس فى جزء مش بيتشرح فى المحاضرات
بيتاخد سكاشن بس وساعات بيخلوا شباتر تتشرح فى السكاشن بس ..وشباتر تتشرح فالمحاضرات بس..عشان يضمنوا انكم بتحضروا الاتنين والسكاشن عليها حضوور ..ودرجات ..بس قليلة يعنى...
والمحاضرات كانت عادى لحد ما فمرة د.غادة رئيس القسم ..معجبهاش الحال فقررت تدخل هى وكل الدكاترة بقايمة الاسماءعشان ياخدوا حضور وغياب ..ويبقوا عارفين مين اللى بيحضر فالشفوى..وبالتالى الانطباع الاول بيدووم سواء بتحضر او لأ ومحاضراتهم اصلا لازم تتحضر ..لانها مفيدة وبيشرحوا حلو
نبذة عن الدكاترة
د.غادة رئيسة القسم ...ودى حتى لو قررتوا انكم متحضروش المحاضرات لازم تحضروا محاضراتها..
لانها بتقول حاجات بتسهل بيها الشرح وتعد تعيدها كتير وبتسأل فيها ساعات فالشفوى عشان تعرف انت كنت بتحضر ولا لأ

د.طارق ..وده وكيل الكلية ..ومش بيدخل كتير المحاضرات بيشرح شبتر واحد على الاكثر وخلاص .وبيحب يشرك الطلبة معاه فالشرح

د.عمرو ...بيشرح حلو ..وبيعد يربط الدراسة بالحياة العملية فيما بعد ..وبيدى اسئلة محتاجة تفكير وممكن يجيبها فى امتحانات الميد ترم

د.داليا : ودى فنظرى احسن دكتورة دينتال ماتريال هتقابلها..دكتورة بتراعى ربنا ثم ضميرها فى الشرح ومش بتنقل على اى نقطة غير لما تضمن ان مفيش اى حد عدت منه النقطةاللى قبلهاوبتقول اسئلة وحاجات تربط بيها برده وبتبقى مهمة وحلوة للشفوى بعد كده
د.محمد صلاح : دكتور كويس ..مش هقدر اقول غير كده بس حاولوا تركزوا فى محاضرته

قولنا هى توتال عليها 150 درجة
منهم 15 اعمال سنة...و20 شفوى و5 درجات لحاجة اسمها سيمنار
وهو ان بيلف الدور على كل طالب فالسكشن من تانى سكشن علطوول لجزئية بيختارها المعيد بتاع السكشن للطالب ده
انه يحضر فيها معلومات خارجية عن كتاب الكلية ومطلوب منه انه السكشن اللى بعده يشرح النقط اللى جابها لزمايله واصاد السكشن كله
وموضوع سهل ان شاء الله وبسيط بس عايز شوية ثقة..وانك تحس انك هتبقى دكتور فلازم تتعامل مع ناس كتير وتعرف تبقى واثق ادامهم وساعات دكاترة المادة بيلفوا عالسكاشن يشرفوا ويا حظه لو دخل دكتور وهو بيعمل السيمنارإما هيسأله؟؟ او يعلق على اسلوبه فخليكم حذرين ومذاكرين وفاهمين اللى بتشرحوه كووويس جدااا
وكده بيبقى فاضل 110 بيبقوا كلهم متقسمين على ورقة النظرى..وان شاء الله الموضوع سهل..بس محتااااجة مذاكرة
اول بأول ومينفعش تتساب..
كده الدنتال

2-Human dentition

تانى مادة من مواد اسنان ...وانا عن نفسى كنت بموووت فييييهااحلى وأمتع مادة بالنسبالى انا واحلى قسم كمانبرده من 150بس فيها عملى نحت سنان على شمع بمقاسات ..ودى السكاشن ..والعملى عليه 40 درجة20 ترم اول وزيهم ترم تانى
وفى برده اتنين ميد ترم ..معرفش بكام كل واحد بس حاجة بسيطة يعنى ..ممكن زى الدنتال
المادة عبارة عن كتاب واحد ..بس مرجع اساسا
متقسم لتلات اجزاء..مقدمة ..ووصف لكل الاسنان ..وجزء فسيولوجى ووضيفة
المقدمة..مهمة وبيجى فيها اسئلة كتييير جداا ومحدش يستهون بيها ..ود.مدحت الزينى بيحب يسأل فيها سواء فالمحاضرة او فالشفوى وده اساسى عنده
الوصف :ممكن ارخم حاجة ..وعايز حفظ كتييييير ..واهم حاجة مذاكرته تكون بالرسم ..مذاكرته من غير رسم ولا ليها لزمة
ولازم تبقى مربط الكلام بالرسم ..عشان تبقى فاهم انت بترسم ايه..لأن فى كل الامتحانات بتاعتهم لااازم رسم

جزء الفسيولوجى : جزء حلو جدااا ..ومهم برده ..بيحتاج تبقى فاهمه كويس برده مع شىء من الحفظ اكييد
أهم حااجة فالمادة التجميييييع ...لازم تجمع وتربط بين كل سنة والتانيه لأن الامتحان بيجى فى صورة مقارنات ولو هتذاكر من الكتاب عادى..بس توهااان
وكلام كتير عالفاضى...المذاكرة من ورق الدرس مفيدة جدا فى مادة زى دى ..وفيه كل حاجة زى الكتاب بس قايل المهم واللى مطلوب وشايل الرغى

الامتحان بيجى ورقة نظرى اسئلة مقالية فى اول ساعتين..وبعدين اخر ساعة 60 MCQs
و20 صح وغلطالنظرى كله عليه 70درجةوطبعا فى 20 درجة للشفوى

دكاترة المادة:
د.مدحت الزينى : الدكتور الأكثر احتراما فى نظرى ..ومش هتقابلوا دكتور زيه تانى فالكلية ..من وجهة نظرى ..دكتور جاد جداا وفنفس الوقت بيقرب الطلبة ليه..شخصية كده ..بيدخل محاضرات معينة كده محفوظة..بيحب يسأل اوى فالمحاضرات خصوصا الاولانية..فدايما تركزوا..وساعات بياخد الغياب

د.سوزى: رئيس القسم..دكتورة طيبة ومش بتدخل كتير ...وحاولوا تركزوا برده فى محاضراتها

د.ريهام:للأسف مدخلتلناش كتير..دكتورة صغيرة فالسن بس مجتهدة جداا وشرحها ما شاء الله عليه

د.أحمد حلاوة: احترس من الخط
دكتور كويس ...شوية..بس بيشرح بسرعة جداا...بياخد الغياب واسلوبه ساخر...لو لقى حد اكتر من محاضرة محضرهاش
فالشفوى ...كان اكتر دكتور الطلبة بتشتكى من اسلوبه مش من اسئلته
ربنا يهديه عليكم..بيفتكر الاشكال كويس جداا
زى دكتور مدحت الزينى برده

د.داليا: بتدخل تدى برى لاب...تعلمكم فيه الرسم لان مطلوب منكم رسم بمقاسات فى كتاب العملى وده بيبقى الساعة التانية من المحاضرة الساعتين

د.خالد: برده دخل معانا فالبرى لاب اخر السنة..ويا ريته يدخلكم علطوول من اول السنة...لااااااازم تحضروا البرى لاب ومتطنشوش لانه بيشرح بضمير ما شاء الله مش بس للعملى لأ حاجات كمان تفيد للنظرى..فحاولوا تكسبوه واى حاجه هتطلبوها يساعدكم فيها مش هيتأخر ان شاء الله

العملى بقى ..محتاج تدرييييب كتييير ومتيأسوووش من الاول..ادربوا فالبيت بس مضيعوش فيه الوقت برده ..ولازم توروا السنان اللى بتعملوها لدكاترة كتير..
والرسم كمان ودوه لأن الكتاب بيتجمع فالآخر وبيتصحح بدرجات الله اعلم هى كام
اخر السنة فى مع الcarving
tooth ID & jaw ID
وده بيبقى السكشن الاخير فالسنة اصلا تتعرف على اسنان طبيعيةوتحدد عمر الفك..عن طريق تواريخ السنة اللى انت لازم تبقى حافظهاعليه 2.5 اصلا ده بالنسبة لل tooth ID ..اما ال Jaw فده درجته ضمن الشفى ويا جه يا لأ
بس كده بالتوفيق ان شاء الله

انتظروا مواد طب..
وسورى للتطويل

على فكرة انا هحط الموضوع ده فى كلام اسنان ان شاء الله ..عشان الكل يستفاد

احلي حاجة فيكي يا ايمان انك بتدي كل حاجه حقها Very Happy

وعنك ضميير في الشرح Smile

وبتتفاني في ايصال المعلومه Laughing

حلو يا ايمو تعبك معش بس جزاكي الله خيرا

اصلي كروت العيال السنه الي فاتت Neutral

مناااايفة بقى هنقووول ايييه

ماشى يا ستى ميغسيييه ... بس امال لو شفتى بقيته بتاع مواد طب هتقولى ايه؟

تصويب واجب
د.احمد حلاوه ممتاز بس فى شرح الاورال هستولوجى
انما الموضوع جميل وهادف وحلو لازاله بعض الغموض للناس قبل ما تدخل السنه
جزاكم الله خيراً

جزااانى واياااكم ..
وبعدين ماشى د.احمد حلاوة صحابى قالولى كده ..بس انا مشفتش بقى ..
انا قلت من وجهة نظرى المحدودة ..اقول حاجه مجربتهاش يعنى؟؟:p